ភ្នំពេញ៖ អ្នកទេសចរចិនអាចប្រើប្រាស់លុយយ៉ន់គ្រប់សេវាកម្មទេសចរណ៍ទាំងអស់អំឡុងពេលធ្វើទស្សនកិច្ចនៅកម្ពុជា។ នេះជាការគូសបញ្ជាក់របស់ រដ្ឋមន្ត្រីក្រសួងទេសចរណ៍ លោក ថោង ខុន ប្រាប់អ្នកសារព័ត៌នៅអាកាសយានដ្ឋានអន្តរជាតិភ្នំពេញ ក្នុងពេលទទួលស្វាគមន៍ជើងហោះហើរ ដឹកអ្នកទេសចរចិន មកកម្ពុជា នៅព្រឹកថ្ងៃទី០៧ ខែកុម្ភៈ ឆ្នាំ២០២៣។

ក្រសួងទេសចរណ៍បានត្រៀម និងរៀបចំជាស្រេចក្នុងការទទួលភ្ញៀវទេសចរចិន តាមរយៈការចងក្រង “China Ready” សម្រាប់ស្វាគមន៍អ្នកទេសចរចិន ដោយបានបណ្តុះបណ្ដាលគ្រប់សេវាកម្ម ដើម្បីសម្រួលដល់អ្នកទេសចរចិនឱ្យទទួលបានអារម្មណ៍រីករាយក្នុងការដើរកម្សាន្តក្នុងប្រទេសកម្ពុជា ជាពិសេសការប្រើប្រាស់លុយចិននៅកម្ពុជា។

លោក ថោង ខុន បានថ្លែងថា៖ «ពិសេសទៅទៀតគឺរាជរដ្ឋាភិបាលបានអនុញ្ញាតឱ្យមានការទូទាត់ជាលុយយ៉ន់គ្រប់សណ្ឋាគារ គ្រប់ភោជនីយដ្ឋានទាំងអស់ គ្រប់សេវាទាំងអស់យើងអាចទទួលលុយយ៉ន់បាន»។

គួរឱ្យដឹងដែរថា រដ្ឋាភិបាលចិនបាន អនុញ្ញាតឱ្យប្រជាជនរបស់ខ្លួនចេញទៅដើរកម្សាន្ត នៅក្រៅប្រទេសឡើងវិញបាន ដោយតាមការប៉ាន់ប្រមាណ របស់រដ្ឋមន្ត្រីក្រសួងទេសចរណ៍ នឹងមានអ្នកទេសចរចិន ៨០ម៉ឺន ទៅ១លាននាក់មកលេងកម្ពុជា ខណៈភ្ញៀវទេសចរអន្តរជាតិទូទៅដែលធ្វើដំណើរ តាមផ្លូវទឹក ផ្លូវគោក និងផ្លូវអាកាសនឹងមកលេងកម្ពុជា ប្រមាណ៣ទៅ ៤លាននាក់៕